नाशिक – नाशिकच्या सहदेव नगर परिसरात घडलेल्या एका धक्कादायक घटनेने काही क्षणांसाठी सर्वांचा हृदयाचा ठोका चुकवला. घराच्या पहिल्या मजल्यावरील गॅलरीत खेळत असताना अवघ्या ३ वर्षांचा चिमुरडा लोखंडी रेलिंगवरून तोल गेल्याने खाली कोसळला. अचानक घडलेल्या या प्रकारामुळे परिसरातील नागरिकांत एकच हलकल्लोळ माजला.
कसा घडला प्रकार ? खेळण्याच्या नादात हा लहानगा गॅलरीत आला आणि रस्त्यावरून जाणाऱ्या दोन मुलांची गंमत पाहू लागला. त्यांच्या खेळण्याकडे पाहत असताना तो नकळत लोखंडी रेलिंगवर चढला. यावेळी त्याचा तोल सुटला आणि क्षणार्धात तो खाली कोसळला.
धडकेचा आवाज होताच चिमुरड्याची आई घराबाहेर धावत आली. तिच्या किंकाळ्या ऐकून स्थानिक नागरिकांनीही तत्काळ धाव घेतली. परिसरातील लोकांनी चिमुकल्याला उचलून सुरक्षितपणे त्याच्या परिवाराच्या ताब्यात दिले.
CCTV फुटेज समोर या संपूर्ण घटनेचा अंगावर काटा आणणारा CCTV व्हिडिओही समोर आला आहे. सुदैवाने, हा चिमुरडा सुरक्षित असून त्याच्यावर उपचार सुरू आहेत. तातडीने दिलेल्या मदतीमुळे मोठा अनर्थ टळला आहे.





