जळगाव – शहरालगतच्या सावखेडा शिवारात चोरट्यांनी एकााच रात्री चार शैक्षणिक संस्थांवर धाड घालत मोठी चोरी केल्याची धक्कादायक घटना उघड झाली आहे. २५ ते २६ नोव्हेंबरच्या मध्यरात्री वर्धमान सीबीएसई स्कूल, जी.एस. रायसोनी पब्लिक स्कूल, शानबाग शाळा आणि गुरुकुल किड्स यांचे मुख्य दरवाज्यांची कुलुपे तोडून चोरट्यांनी प्रवेश केला.
चोरट्यांनी नेमके ‘अ‍ॅडमिन रूम’ निशाण्यावर घेत ड्रॉवरमधील १ लाख ९४ हजार रुपये इतकी रोकड लंपास केली. आधीच वाढत्या चोरीच्या घटनांमुळे नागरिक चिंतेत असताना शाळाच टार्गेट झाल्याने पालक, शिक्षक आणि व्यवस्थापनात प्रचंड भीतीचे वातावरण निर्माण झाले आहे.
चोरीची घटना २६ नोव्हेंबर रोजी सकाळी सहा वाजता समोर आली. वर्धमान शाळेचे प्राचार्य आशिष अजमेरा यांनी तातडीने जळगाव तालुका पोलीस ठाण्यात तक्रार दाखल केली. पोलिसांनी अज्ञात आरोपींवर गुन्हा नोंदवला आहे. चारही शाळांमध्ये एकाच पद्धतीने चोरी झाल्यामुळे ही एकाच टोळीची कारवाई असण्याची शक्यता पोलिसांनी वर्तवली आहे.
पोलीस उपनिरीक्षक श्यामकुमार मोरे यांच्या मार्गदर्शनाखाली तपास सुरू असून चोरट्यांचा माग काढणे हे पोलिसांसाठी मोठे आव्हान ठरत आहे. या घटनेनंतर परिसरातील इतर शैक्षणिक संस्थांच्या सुरक्षेबाबत चिंता वाढली असून अतिरिक्त सतर्कता बाळगण्याचे आवाहन करण्यात आले आहे.
