जळगाव : तापी पाटबंधारे महामंडळाच्या जळगाव विभागात अधीक्षक अभियंता म्हणून कार्यरत असलेले अरुण बाबूराव ढवळे (वय ४०, रा. संभाजी चौक, महाबळ) यांचा अपार्टमेंटच्या चौथ्या मजल्यावरून पडून मृत्यू झाल्याची दुर्दैवी घटना गुरुवारी सायंकाळी साडेसात वाजता घडली. या प्रकरणी रामानंदनगर पोलिस ठाण्यात अकस्मात मृत्यूची नोंद करण्यात आली आहे.
ढवळे कुटुंबीयांसह शहरातील संभाजी चौकातील ‘मातोश्री हाइट्स’ या अपार्टमेंटमध्ये भाडेतत्त्वावर वास्तव्यास होते. गुरुवारी सायंकाळी ते इमारतीच्या चौथ्या मजल्यावरून खाली पडले. मोठा आवाज झाल्याने रहिवाशांनी बाहेर धाव घेतली आणि गंभीर जखमी अवस्थेत असलेल्या ढवळे यांना तातडीने खासगी रुग्णालयात हलविले. मात्र उपचारादरम्यान त्यांचा मृत्यू झाला.
अरुण ढवळे यांची नुकतीच पदोन्नती होऊन तीन महिन्यांपूर्वी त्यांची जळगावात बदली झाली होती. अचानक झालेल्या या मृत्यूने ढवळे कुटुंबावर दुःखाचा डोंगर कोसळला असून परिसरात हळहळ व्यक्त केली जात आहे.
