मुंबई : घाटकोपर येथील शहनाज (वय माहिती उपलब्ध नाही) या वृद्ध महिलेच्या हत्येप्रकरणी पोलिसांनी त्यांच्या सावत्र सुनेला अटक केली आहे. संपत्तीच्या वादातून ही हत्या करण्यात आल्याचे तपासात उघड झाले आहे. अटक केलेल्या महिलेचे नाव मुमताज काझी असून, तिने सासूचे दागिने चोरल्याचाही संशय व्यक्त करण्यात आला आहे.
घाटकोपर पश्चिमेतील मुकुंद सोसायटीमध्ये शहनाज एकट्याच राहत होत्या. २६ नोव्हेंबर रोजी, बुधवारी सायंकाळी त्या घरात मृतावस्थेत आढळल्या. जबरदस्तीने घरात प्रवेश केल्याचे कोणतेही चिन्ह न आढळल्याने घरच्यांचा सहभाग असण्याची शक्यता पोलिसांनी गृहीत धरली.
तपासादरम्यान शहनाज यांच्यात मालमत्तेवरून सावत्र कुटुंबीयांशी वाद सुरू असल्याचे समोर आले. सोसायटीतील सीसीटीव्ही फुटेजमध्ये बुरखाधारी महिला घरात प्रवेश करताना दिसली, यामुळे पोलिसांना तपासाची दिशा मिळाली. अखेर चौकशीदरम्यान तथ्ये उघड झाल्याने मुमताज काझीला अटक करण्यात आली असून पुढील तपास सुरू आहे.
नवी मुंबईत २२ वर्षीय तरुणीची आत्महत्या; शेजाऱ्याविरोधात गुन्हा नवी मुंबई : उलवे सेक्टर 25A येथे राहणाऱ्या कुमकुम बलविंदर कौर (वय २२) हिने आत्महत्या केल्याची धक्कादायक घटना उघडकीस आली आहे. मृत्यूपूर्वी तिने आपल्या मित्र संदीप याला पाठवलेल्या व्हॉइस नोटमुळे या प्रकरणाला नवे वळण मिळाले आहे.
ऑडिओ संदेशात कुमकुमने आपल्या शेजारीण अंजली शर्मा (वय २५) हिच्याकडून तिला गेल्या काही महिन्यांपासून मानसिक त्रास दिला जात असल्याचा उल्लेख केला आहे. घटनेनंतर कुमकुमचे कुटुंबीय पंजाबहून नवी मुंबईत येऊन उलवे पोलीस ठाण्यात तक्रार दाखल केली. तिचा भाऊ गौरव यांनी दिलेल्या तक्रारीच्या आधारे पोलिसांनी अंजली शर्मा हिला ताब्यात घेतले असल्याची माहिती वरिष्ठ पोलीस निरीक्षक अर्जुन राजणे यांनी दिली.
घटनास्थळी पंचनामा करताना तपास पथकाने राखाडी-पांढरा स्कार्फ जप्त केला असून, त्याचाच वापर आत्महत्येसाठी केला असावा, असा प्राथमिक अंदाज आहे. हा स्कार्फ फॉरेन्सिक तपासणीसाठी पाठवण्यात आला आहे. तसेच कुमकुमचा मोबाईल फोन, कॉल रेकॉर्ड, संदेश, आणि समाजमाध्यमावरील संभाषणांचे विश्लेषणही सुरू आहे.
