छत्रपती संभाजीनगर – वाळूज-रांजणगाव शेणपुंजी फाट्याजवळ बिअर बॉटलचे बॉक्स घेऊन जाणारा कंटेनर उलटल्याची घटना शुक्रवारी रात्री नऊच्या सुमारास घडली. अपघातात कंटेनरचा चालक सय्यद अब्दुल्ला केबिनमध्ये अडकला होता. ‘मला बाहेर काढा’ अशी विनवणी तो करत असतानाच काही नागरिकांनी त्याला मदत करण्याऐवजी रस्त्यावर पडलेल्या बिअर बॉटल्स उचलून पळ काढला, हा प्रकार माणुसकीला काळिमा फासणारा ठरला.
अपघातानंतर परिसरात मोठी गर्दी जमली आणि रस्त्यावर बिअरच्या बॉक्सचे ढीग पडल्याने सुमारे दोन तास वाहतूक ठप्प झाली.
अपघाताची माहिती स्थानिकांच्या म्हणण्यानुसार, एका बियर उत्पादन कंपनीचा कंटेनर सुमारे दोन हजार बिअर बॉटल्स घेऊन जळगावकडे जात होता. वाळूज येथील धनुष्यबाण कमानीजवळ आल्यावर अचानक चालकाचे नियंत्रण सुटले आणि कंटेनर रस्त्यावर उलटला. कंटेनर उलटल्यानंतर डिझेलची गळतीही सुरू झाली.
गर्दीचा गैरवापरअपघातानंतर जमलेल्या गर्दीने कंटेनरमधील बिअर बॉटल्स हिसकावून नेण्यास सुरुवात केली. त्याचवेळी, केबिनमध्ये अडकलेला चालक अब्दुल्ला याने मदतीसाठी आक्रोश केला, पण जमावाकडून मदत मिळेपर्यंत बराच विलंब झाला.
पोलिस आणि अग्निशामक विभागाची कारवाई घटनेची माहिती मिळताच पोलिसांनी घटनास्थळी धाव घेतली आणि अग्निशामक दलाला पाचारण केले. जमावावर नियंत्रण आणण्यासाठी अग्निशामकांनी पाण्याचा मारा करावा लागला. त्यानंतर परिसराला पोलिसांनी वेढा घातला आणि कंपनीच्या अधिकाऱ्यांच्या मदतीने रस्त्यावर पडलेली बिअर दुसऱ्या वाहनातून परत नेण्यात आली.
चालकाची सुटका कंटेनरच्या केबिनमध्ये अडकलेल्या चालकाला अखेर पोलिस आणि अग्निशामक दलाच्या मदतीने बाहेर काढण्यात आले. अपघातात तो जखमी झाला असून त्याच्यावर रुग्णालयात उपचार सुरू आहेत. अपघाताची नेमकी कारणमीमांसा अद्याप समोर आलेली नाही. वाळूज पोलीस पुढील तपास करत आहेत.
