कराड : नाशिकहून कोकण सहलीवर गेलेल्या विद्यार्थ्यांची खासगी बस आज (मंगळवार) पहाटे नाशिककडे परतत असताना कराड तालुक्यात अपघातग्रस्त झाली. वाटार गावाजवळ महामार्गावर झालेल्या या भीषण दुर्घटनेत अंदाजे ३० ते ३२ विद्यार्थी जखमी झाले असून एकाची प्रकृती गंभीर असल्याची माहिती पोलिसांनी दिली.
मिळालेल्या माहितीनुसार, पिंपळगाव (जि. नाशिक) येथील विद्यार्थ्यांचा गट सहलीवर कोकणात गेला होता. सहल संपल्यानंतर ही बस सोमवारी उशिरा रात्री नाशिककडे रवाना झाली होती. पहाटेच्या सुमारास बस वाटार (ता. कराड) गावाच्या हद्दीत पोहोचताच चालकाचा रस्त्याचा अंदाज चुकला. रस्त्याचे काम सुरू असल्याने बाजूचा भाग खोल होता आणि बस घसरून थेट पुलावरून खाली कोसळली.
अपघातात बसमधील अनेक विद्यार्थी जखमी झाले असून त्यापैकी एका विद्यार्थ्याची प्रकृती गंभीर असल्याचे समजते. सुदैवाने मोठी जीवितहानी टळली असली तरी बस पूर्णतः क्षतिग्रस्त झाली आहे. पोलिसांनी घटनास्थळी धाव घेत बचावकार्य सुरू केले असून जखमींना तातडीने उपचारासाठी रुग्णालयात दाखल करण्यात आले आहे.
