नागपूर : सदर पोलीस ठाण्याच्या हद्दीत संविधान चौकात झालेल्या भीषण अपघातात भरधाव ट्रकने मोटारसायकलला दिलेल्या धडकेत भाऊ-बहीण ठार तर एक जण गंभीर जखमी झाला. उपराजधानीत हिट अँड रनच्या घटना वाढत असल्याचे पुन्हा एकदा स्पष्ट झाले आहे.
मृतांमध्ये रुद्र सुनील सिंगलधुपे (११) आणि त्याची बहीण सिमरन सुनील सिंगलधुपे (१२) यांचा समावेश आहे. तर शेषनाथसिंग जागेश्वरसिंग (५६) जखमी असून त्यांच्यावर उपचार सुरू आहेत. तिघेही मूळचे बालाघाट (मध्य प्रदेश) येथील असून सध्या केजीएन सोसायटी, काटोल रोड, नागपूर येथे वास्तव्यास आहेत.
लग्नावरून परतताना भीषण अपघात
माहितीनुसार, शेषनाथसिंग यांचा दुधाचा व्यवसाय असून ते सध्या घराच्या बांधकामावर देखरेख करतात. कुटुंबातील नातेवाइकाचे कामठी येथे मंगळवारी लग्न होते. रुद्र आणि सिमरन यांनी लग्नाला जाण्याचा हट्ट धरल्याने शेषनाथसिंग यांनी दोघांना एमएच-३१-एफके-१८११ या मोटारसायकलवरून कामठीला नेले.
लग्नावरून रात्री सुमारे १०.३० वाजता ते नागपूरकडे परतत असताना संविधान चौकात एनएल-०१-एजी-०८६८ क्रमांकाच्या भरधाव ट्रकने मागून मोटारसायकलला जोरदार धडक दिली. या अपघातात रुद्रचा घटनास्थळीच मृत्यू झाला. अपघातानंतर ट्रकचालक पसार झाला.
सिमरनला मेयो हॉस्पिटलमध्ये तर शेषनाथसिंग यांना खासगी रुग्णालयात दाखल करण्यात आले. मात्र उपचारादरम्यान सिमरनचा मृत्यू झाला.
सीताबर्डी पोलिसांनी फरार चालक सहेंद्र पंचम बिन (३७, रा. मिर्झापूर) याला ताब्यात घेतले असून त्याच्याविरुद्ध प्राणांतिक अपघाताचा गुन्हा नोंदवण्यात आला आहे.
कामठीमध्ये अज्ञात वाहनाने श्रमिक ठार
जुनी कामठी पोलीस ठाण्याच्या हद्दीतील वारेगाव मार्गावर झालेल्या स्वतंत्र अपघातात अज्ञात वाहनाने धडक दिल्याने एक श्रमिक ठार झाला. मृताचे नाव मिथुन दुर्योधन मेते (३८, रा. देशकनलग्राम, पश्चिम बंगाल) असे आहे.
मिथुन ए. एस. इन्फ्रा कंपनीमार्फत सुरू असलेल्या मेट्रो कामावर श्रमिक म्हणून कार्यरत होता आणि तो श्रमिकांच्या वसाहतीत राहात होता. मंगळवारी रात्री तो पायी जात असताना अज्ञात वाहनाच्या धडकेत त्याचा मृत्यू झाला. अपघातानंतर वाहनचालक पसार झाला असून जुनी कामठी पोलिसांनी प्राणांतिक अपघाताचा गुन्हा नोंदवून चालकाचा शोध सुरू केला आहे.
